السلام عليكم ورحمه الله وبركاته ..
شحالكم؟ عساكم بخير ..؟
هذي قصه من محاولاتي فالكتابه..اتمنى انها تنال اعجابكم و اتمنى تواصلكم جميـع
.. تراه القصه واقعييه وفي نفس الوقت فيها شوي من الخيال .. تحكي قصة حياتنا..ضحكتنا..و دمعتنا.. .. >> لكن اكيد مع بعض التغييرات في الاسامي وزياده بهارات ^___*
أتمنى منكم المشاركة و المساندة بآراءكم
هالشي بيسعدني وااايد
أخليكم مع القصــه
وأن شااء الله انها تنال إعجابكم
اختكم.."~طبعي~شيوخي~"
»‡»يُاٍلًِلَه‡يٌاٍ‡قُلٍبًيُ‡سُرِيُنًاٍ‡ضُاٍقَتً‡ال ُدِنٍيُا‡عُلٍيَناْ«‡«
الجــــــــــــــــــزء الاول
يوم الاربعاء السااعه 1 فليل كانن البنات قاعدات في الحجره و ماخذاتنها سوالف لانه أخر الاسبوع وهذا هوه وقت اجتماع (بنات شربت) اللي هن مهره واليازيه والريم و سلامي وعاد كل وحده منهن مشتاقه حق الثانيه والعلوم ماشااء الله مكوده.. لانهن طول الاسبوع ما يتلاقن.. شاغلتنهن الدراسه وانتو تعرفون عاد كيف ايام الدراسه... المهم.....
مهروه : اقول بنات شو رايكن انروح باجر البر لان الجو بصراحه ما يتفوت .
سلامي : هيه والله شو رايكن بنأجر دراجات على حسابي
الريم : خلاص انا باجر بسوي تلفون وبرمس الريال علشان نحجز .
سلامي : هاه يزوي ماقلتي شو رايج اشوفج ساكته .
يزوي : انا ماعندي مانع بس منوه اللي بيردفني .
مهاري : أنا لا تخافين
وعاد جلب موج البنات عن سوالفف البر لين سوالف المدرسه واللي صارلهن وكل وحده تقول شو استوالها وخاصه ان مهره في مدرسه حكومه والباقيات مع بعض في خاصه يعني ماتعرف شو علومهن ولا هن يعرفن <<(( عاد مهره فضولها يقطعها وتموت وتعرف كل شيء وما تعدي الليله على خير الا وهيه ماخذه العلوم كلها ))
وفي نص السهره على الساعه 3:02 am
سلامي : ايه قومن بنسير تحت ندورلنا شيء نطفحه (( ناكله ))
يزوي : هيه والله صدق انا يوعانه
مهره : لا انا اخاف انزل
سلامي : عاد عن المصااخه اقول الريم قومن يالله خلنا ننزل وانتي يلسي اروحج...انزين... مهره : لالا خلاص بسير وياكن عن تيني ام فستان (( سكنيه من نسج خيال بنات شربت ))\
الريم : يالله بعدين بيتأخر الوقت
وهن على الدري كل وحده شابصه في الثانيه لان تحت البيت ظلام << اوه نسيت اقولكم
نحن قاعدات في بيت سلامه وهيه وحيده امها وابوها والبيت واايد عوود وفاضي محد فيه << جنه مقبره سكن..تشبيه بليغ حق البيت في الليل <<المهم سلامي عمرها 16 سنه .. يعنــي كبر مهاري ماشاء الله عليها وايد طويله وعريضه (( والطماشه صدق يوم يوقفن هيه ومهاري عدال بعض..هههه)) كل شيء في ويها صغير وcute يعني ملامحها عاديه وهاديه.. شعرها مثل شعر يزوي بس لونه بني على أحمر (( الله يخلي الحناء)).. أنسانه غامضه..حنونه .. ورومنسيه لابعد الحدود .. ومن كثر مايحبها الحزن .. صارت تعشق ترابه ...
وصلن البنات المطبخ وقعدن يدورن شيء ياكلنه بس للاسف مالقن بس مستحيل يردن فوق وهن بيوعهن
مهره : ايه تبني اسويلكن جاهي..؟
سلامي : هيه...بس الله يخليج ترسيه شكر
يزووي : لا تحطين شكر وايد.. واللي تبى بتزيد
مهروه : بس فكني من صدعتكن انا بسويه على كيفي.. بس عليكن يوم اني تكرمت و قلت بسويلكن
الريم : خيبه عاد اللحين بتذلنا
سلامي : الريم سيري هاتي بيض من الثلاجه
الريم : ليش شو ناويه تسوين
سلامي : أنتي هاتيه أول وبعدين بتشوفين
يزوي : انا ماداني البيض لا تحسبون حسابي
وعاد طبخن البنات وطلعن من المطبخ وخلنه في حاله يرثى لها.. خطف عليهن الوقت و هن يسولفن ((يا مكثر سوالفهن!!))... و أذن عليهن الفير..نشن يتمسحن عشان يصلن...و طبعا شي ما ينسنه هو انهن يحطن ورقه على الباب عشان محد يوعيهن... سارن البنات يرقدن...بس مهاري و يزوي وين ايرومن يرقدن و في خواطرهن شي...لازم يحشن في حد ولا ما بيهنالهن الرقاد.... و مناك سلامي مفولة عليهن..تبى ترقد و هن مسوياتلها أكبر طاااف............................................. .....................................
الجمعه- الساعة 10:00am
ترررررن تررن ترن ترررررن
صاح المنبه عدال يزوي و وعاها...((عااد الحين بنسولفلكم عن يزوي))
اليازية..عمرها 17 سنة..عاقل و رزين (( بس هب دووم ))..تموووت وتحش في خلق الله.. والله يعين اللي بيطيح فلسانها هيه ومهاري والنيرة((بنت يران سلامــي بعد بس مش كثر يزوي ومهاري))...يوم يتيمعن أنصاف الليالي صدق ينتفن الخلق تنتيف .. يزوي وايد ضعيفه بس عضمتها طبيعي عريضه .. بيضه وعيونهــا كبااار ..طولها ماشي حاله .. شعرها كيرلي (curly) يوصل لنهايه ظهرها ..وهالشيء اللي يميزها هيه وسلامــي بعد .
يزوي: مهاري ,, مهاري
مهاري : ....................>>في سابع نومه ومسويه طااف
يزوي : مهاري قومــي .. يالله عاااد
مهاري: هااااه شو بلاج
يزوي : قومـي الساعه 10
مهاري: انزين صبري... بس غفوة
يزوي : يعني شو بتفيدج... يلا قومي خلينا ننزل تحت ونوعي هاذيلا بعد
قامن وتسبحن و سلامي والريم بعدهن راقدات )) يحليهن اللحين بيهن شيء من يزوي و مهاري ))
وتمن يزوي ومهاري يتكلمن بصوت عالي وبندن المكيف علشان الانسات يقومن وعاد نشت سلامـــي وهيه متضيجه عليهن شويه بتصفعهن (( عادي مجرد انها تقوم وتتسبح تنسى انها متضيجه علينهن) وخلصن البنات ونزلن تحت ...
-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-
دشن بنات شربت الصاله وكانت هناك أم سلامــي ويدتها
البنــات : السلام عليكم
الكــل : وعليكم السلام
أم سلامي : هاه شو اصبحتن .
سلامـي : بخير الحمدالله
يده سلامـي : أسميه البيت بيبات يصفر يوم بتسرن عنا
مهاري: عاد شو نسوي أمايه نحن لازم انسير باجر دوام (( اونهن علشان يدرسن .. خرييييييط ))
يده سلامـي : عاد هب تغبن غبت الذيب تعالن لاتقطعن حليلها اختكن رويحتها .
يزوي : انشاء الله امايه يوم الاربعاء بنيكم
عقب الغـــــــــــــــــــداء توكلن البنات بيوتهن وأفترقن (بنات شربت) على أمـــل أنهن يتلاقن ويشوفن مهــاري يوم الأربعاء اليــــاي...
السبـــت – الساعه 6:15 AM
في بيـــــت مهاري .. دشت أم مهاري الحجره علشان توعيها (( الله يعينها ))
أم مهاري: مهره ,, مهره ,, مهره
مهاري: هممممممممم
أم مهاري: يالله أمايه نشي عليج مدرسه هبابج تتزهبين
مهاري: أنزين .. أنزين
طلعت امها وبندت المكيف(( الحركه المعتاده )) وكل البيت قام وتلبس وخلص إلا الشيخه مهره بعدها راقده ودشت عليها أختها شمه ويوم شافتها راقده بغت اتموت البنت لين اللحين رااقده وهيه عليها محاضره الساعه 8:00
شمه: مهروووه و صمخ الساعه قدها 7:15وانتي بعدج راقده.. عليه محاضره أنــا
مهره: اللحين بقوم والجامعه مابطير
شمه: أنا سايره الجامعه.. يبالي نص ساعه لين اوصل وحضرتج لين اللحين راقده.. دوريلج حد يوديج
مهره: أنزين ذلفي وفكينا
شمه : ماعليــــه
سارت شمه الجامعه هيه وعائشه.... ومهره توها ناشه سايره تتلبس ويوم شافت السااعه ..حست أن صدق ماشيء وقت وهيه دوم تتأخر شيء طبيعي لو المدرسه قالولها ردي البيت .. الساعه اللحين 7:42am والشيخه مهره أدور في البيت تبى حد يوديها ومالقت غير أخوها سلطان ظاهر بيسير الدوام.. جان تلصق فيه ..
مهره : سلطان ,, سلطان
سلطان : شو تبين (( الريال واعي من الرقاد ومش متفيق لحد ))
مهره : مالقيت حد يوديني المدرسه خطفني ماشيء باقي عن الجرس
سلطان ظهر ولا تكلم والهبله تتحرى انه عادي بيخطفها شلت شنطتها وظهرت وركبت وتترياه يحرك السياره .. وكان في خاطره يضحك عليها لانها عزمت عمرها بعمرها .. مهاري عمرها 16 سنه.. سوالف وربشه بس مشكلتها أنها هذو " وايد تتكلم " وبسرعه تزعل .. ممممممم اللي يقهر فيها هيه ويزوي أنهن نحسات . . مهاري وايد حلوه .. عيونها مش كبار بس يجذبن .. خشمها رفيع وطويل واللي محلنها زوود شعرها ماشالله يتخطى ركبها .. بس لاتنغشون واايد.. كونها قصيره هو اللي مبين شعرها طووويل .. وتخااف وايد من الحيوانات (( بدون أستثناء))
فـــــي مدرسة سلامي و يزوي و الريم... وبالتحديد في الbreak
سـلامـي كانت تتمشى تحت ويزوي فوق
سلامــي : يزووووووي .. يزوووووي
يزوي : ................................ ما سمعتها
سلامــي : يزوي .. يزووووووي
يزوي: شو عندج
سلامـي : ماشــي بس يالسه أجرب صوووتــي
يزوي: مسخفج (( كلمتها المعتااده ))
-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-
يتبع